Бөгүн, май 6-да, Танды кожууннуң чагыргазының мурнунга Тыва Республиканың Конституция хүнүнге тураскааткан ёзулалдыг митинг болуп эрткен

Бөгүн, май 6-да, Танды кожууннуң чагыргазының мурнунга Тыва Республиканың Конституция хүнүнге тураскааткан ёзулалдыг митинг болуп эрткен. Бо чугула болуушкунну бистиң республикада чылдың-на демдеглеп турар.

Таңды кожууннуң Төлээлекчилер Хуралының Баштыңы Урана Нурзат биле Таңды кожууннуң чагырга даргазы Алексей Сазан-оол чоннуң чаңгыс деминиң демдээ кылдыр Конституцияның чугулазын онзалап демдеглээш, чыглып келген чонга байыр чедиргеннер. Тыва Республиканың Конституциязы бистиң республикавыстың хөгжүлдезинге болгаш ооң чурттакчыларының амыдырал-чуртталгазының шынарын бедидер улуг хемчээлдиг чаартылгаларны боттандырарынга бүзүрелдиг үндезин апарган.

Хемчег үезинде «Зарница 2.0» деп патриотчу оюннуң муниципалдыг чадазының аныяк тиилекчилеринге онза кичээнгейни угландырган. Өөреникчилерни угаан-медерел болгаш спортчу сорулгаларга билиглерин болгаш эрес-дидим чоруун көргүскен чедиишкиннери дээш шаңнаан.

Агаар-бойдус булуттуг-даа болза, байырлыг митинг чыылганнарның шуптузунга өөрүшкү болгаш сорук киирер байдалды тургузуп, демниг онзагай болуушкун апарган. Мындыг хевирлиг хемчеглер бистиң ниитилелди быжыктырып, аныяктарның аразында патриотизмниң болгаш хамааты харысаалганың чугулазын онзалап көргүзер.

Конституция хүнү чүгле байырлал эвес, а бистиң ниитилелдиң тургустунган үндезиннериниң кайы хире чугулазын, демократияның үнелиг чүүлдерин, оларны шупту кады камгалап, сайзырадып чоруурувусту сагындырып турар.