Таңды кожуунга тыва национал Хүреш мөөрейи болуп эрткен

Таңды кожуунга тыва национал Хүреш мөөрейи болуп эрткен.

Эрткен неделяда Балгазын суурга Таңды кожууннуң школа назыны четпээн уруглар аразынга национал хүреш маргылдаазының муниципалдыг чадазы болуп эрткен. Ол хемчег «Уруглар садтарынга Хүреш» төлевилелдиң бир кезээ апарган болгаш, Ада-чурт камгалакчызының чылы-биле дүгжүп турар.

Ол маргылдаа бистиң кожуунда 12 уруглар садтарындан 51 чаш мөгелерни чыып алган. Чылдың-на киржикчилерниң саны өзүп, уругларның-даа, оларның ада-иелериниң-даа аразында национал хүрешке сонуургал улгадып турарын өөрүшкү-биле демдеглээр-дир бис. Хүреш уругларга чүгле мага-боттуң шимченгир болгаш спортчу хей-аъдын сайзырадырындан аңгыда, культуравыстың чаңчылдарын кадагалап арттырарынга дузалаар.

Бичии спортчуларывыска чоргаарланып, ам-даа спортка чедиишкиннерни кузедивис! Шупту киржикчилерге, тренерлерге, ада-иелерге деткимчези дээш четтирдивис!