Быштак хайындырарының эге билиглери-биле үлешкен

Быштак хайындырарының эге билиглери-биле үлешкен

Таңды кожуунга "Профессионалитет" федералдыг төлевилелдиң чаңгыс аай ажык эжиктер хүнүнде Кызыл-Арыг суурдан Оксана Каң-оол быштак кылыр мастер-классты Балгазын суурда Тываның агроүлетпүр техникумунга эрттирген.

Элээди таңдыжылар улуг сонуургал-биле адыгей быштак кылыр мастер-класска киржип, ажыктыг билиглерни шиңгээдип алганнар.

Кожууннуң 500 ажыг школачызы ортумак өөредилге чериниң өөредилге-бүдүрүлге төвүнге чедип, көдээ ажыл-агый техниказын, амгы үениң дериг-херекселин, өөредиглиг мастер-класстарны сонуургап көрген.

Кызыл-Арыгдан Оксана Каң-оол биле Даяна Монгуш авашкылар быштак болгаш ак чем кылыр биче бүдүрүлгелиг. Быштак хайындырыкчылары 2016 чылда “Инек – чемгерикчим” төлевилелге киришкеш, ак чемнерни кылып эгелээн.

Эрткен чылын Даяна Монгуш социал керээге үндезилээн күрүне деткимчези-биле дериг-херексел садып алгаш, ажыл-херээн улгаттырганы ол. Эгелеп чоруур сайгарлыкчы быштак кылырынга өөренгеш, дипломну алган.

– Быштактан конфеттерни боттарывыстың бүдүрүп турар Рикотта, Маскарпоне, Филадельфия, Альметте дээш оон-даа өске хевирниң быштактары-биле кылып турар бис. Оларны кылырының техногогиялары аңгы-аңгы болур. Амдан киирер холуксаалары – тоорук, изюм, эки шынарлыг шоколад, какао, чимис, кокос чоңгузу… – деп, аныяк сайгарлыкчы амданныг конфеттер кылырының дугайында таныштырды.

Социал деткимче алыкчыларының сүттен болгаш быштактан кылган аъш-чемин (инек, өшкү сүдү болгаш хоюу, тарак, ээжегей, йогурт, баскан тыва быштак, быштактан конфеттер, быштактың аңгы-аңгы хевирлериниң кескиндилери) найысылалда көдээ ажыл-агый бараан бүдүрүкчүлериниң дыштаныр хүннүң садыглаашкын-ярмарказындан тып ап болур.