Студентилерниң киржилгези

Студентилерниң киржилгези

Тываның күрүне университединиң ветеринария болгаш агрономия факультеттериниң студентилери республиканың эң эки ажылдыг көдээ ажыл-агый бүдүрүлгелеринге өөредилге практиказын дугуржулга ёзугаар эрттирери– келир үениң быжыг билиглиг көдээ ажыл-агый специалис­терин белеткээриниң ажык­тыг аргаларының бирээзи.

Университеттиң агрономия факультединиң бөлүк студентилери Улуг-Хем кожууннуң Арыг-Үзүү сумуда «Оргаадай» көдээ ажыл-агый бүдүрүлге кооперативинге сентябрь айда өөредилге практиказын эрттиргеннер. 3-кү курстуң студентилери Белек Кара-Сал, Адриан Саая, Ачыты Монгуш-оол, Довук Тоглакпан, Доржу Шойзат, Чечен Седип олар комбайн-биле тараа ажаа­рының практиктиг ажылдарынга теоретиктиг билиглерин херек кырында быжыглап, ажаап алган тарааны арыглаа­рының болгаш кадагалап шыгжаарының ажылдарынга киришкеннер.

Келир үениң агрономнары студентилерниң чурттаарынга болгаш дыштанырынга таарымчалыг байдалды «Оргаа­дай» кооператив тургускан. Ажыл-­агыйның бажың-балгадының арыг-силиг, чылыг өрээл­дериниң бирээзинге студентилерни чурттадып каан. Эки шынарлыг болгаш амданныг аъш-чемни повар белеткеп, студентилерни чемгерип турган.

Тываның күрүне университединиң агрономия факультединиң студентилериниң өөредилге практиказы сентябрь 28-те доозулган.