Тывада Өг-бүле чылынга тураскааткан хемчеглер планы бадылаттынган

Тывада Өг-бүле чылынга тураскааткан хемчеглер планы бадылаттынган

Тываның Баштыңы Владислав Ховалыгның айтыышкыны-биле, Президент Владимир Путинниң чарлааны Өг-бүле чылынга тураскааткан хемчеглерни эрттирер республиканың организастыг комитедин тургускан. ТР-ниң Чазак Даргазының оралакчызы Орлан Сарыглар ону удуртуп башкарар.

Тывага Өг-бүле чылында болур улуг хемчеглер

- февраль 20-де «Тыва ниитилелде өг-бүле кижизидилгези: ужур-чаңчылдар болгаш амгы үези» төгерик стол,

- мартта «Чылдың өг-бүлези» бүгү-российжи мөөрейниң регионалдыг чадазы,

- марттың 5-6-да «Херээженнер: езу-чаңчылдарны кадагалап — Россияны хөгжүдээлиңер» деп бүгү-российжи херээженнер шуулганы,

- март биле майда «Чедиишкинниг өг-бүле – чечектелген Тыва» VI иелер шуулганы,

- мартта өскүс болгаш ада-иезиниң хайгааралы чок арткан уруглар аразынга «Херелденген чырык» деп республиканың уруглар чогаадылгазының мөөрейи;

- июль 5-те Өг-бүле, ынакшыл болгаш шынчы чорук хүнүнге тураскаадып «Ынакшыл болгаш шынчызы дээш» деп медальдарны тыпсыр байырлыг хемчег;

- июль 5-те Өг-бүле, ынакшыл болгаш шынчы чорук хүнүнге тураскааткан Өг-бүлелер чыскаалы;

- июнь 12-де база ноябрь 4-те интернационалчы өг-бүлелерниң байырлыг бадылажылгазы, үлегерлиг интернационалчы өг-бүлелерни хүндүткеп байырлаары;

- августа «Наадым-2024» малчыннар байырлалында малчын өг-бүлелер ортузунга «Малчын өг-бүле» республика мөөрейи;

- сентябрьда Өг-бүле чылынга база Кызыл хоорайның 110 чылынга тураскаадып, «Ынак чүректерден – ынак хоорайынга» деп аныяк өг-бүлелерниң куда чыскаалы;

- октябрьда регионнар аразының «Сибирьниң уруглары» элээдилер болгаш студент аныяктарның шуулганынга республиканың киржилгези;

- октябрьда «Төлептиг ада» деп хөй-ниити үнелээшкининиң мөөрейи;

- «Солдаттың адазы» деп хөй-ниити үнелелиниң медалын тыпсыры;

- Улуг назылыглар хүнүнге тураскаадып хөй салгалдарлыг өг-бүлелерни шаңнаары;

- ноябрь 4-де «Аас-кежиктиң тодарадылгазы: 1+1=6»деп хөй ажы-төлдүг өг-бүлелерниң республика фестивалы.

Ажыл-чорудулганың аңгы-аңгы адырларында ажылдап турар, шупту хар-назынның кижилери киржир кылдыр планны тургускан.