Хурээвис ам-на ажыттынган

Хурээвис ам-на ажыттынган

Февраль 7-де, Шагаа байырлалының бүдүүзүнде, бистиң Таңды кожуунга чоннуң демнежип тургаш туттунган Хурээзиниң байырлыг ажыдыышкыны болуп эрткен.



"Дагден Доңгак Чойлинг" Хурээзиниң ажыдыышкынында Тыва Республиканың Камбы-Ламазы хүндүлүг Гелек Нацык-Доржу Башкы болгаш Тыва Республиканың Баштыңының оралакчызы Алик Кертик-оолович Монгуш аалдап келгеннер.

Хүндүлүг Алик Кертик-оолович буянныг үүлениң туңнелдиг болганынга өөруп-четтиргенин чонга илереткен. Хурээниң долгандыр девискээрин чаагайжыдып, ишти-даштын ам-даа сарыг шажын дүрүмнеринге дүгжүп турар кылдыр ажылдарны уламчылаарын дамчыткан.

Байырлыг ажыдыышкынны сарыг шажынның үндезин оңнерин илередип турар кадактарны чежери биле уламчылаан. Чаа Хурээге бир дугаар номналды бистиң чүдүкчү чонувуска Кызыл хоорайдан Цеченлинг Хурээзинден башкылар база бистиң кожууннуң Даа ламазы Эрес Башкы номчаан.

Кожуунуң ангы-ангы булуңнарындан чыылган чон бүгү сагыш-сеткилинден оорушкуну илередип, эки байдалдар оларга тургустунганын илереткен.