Наадымның байырлыг ажыдыышкыны

Наадымның байырлыг ажыдыышкыны

Август 13-те тыва чонувустуң көшкүн амыдыралын, үндезин культуразын сиңирген чараш байырлалы Наадымның ажыдыышкыны болуп эрткен.

Наадым байырлалының эң улуг каасталгазы - республиканың он чеди аңгы кожууннарындан келген төлээлекчилер. Олар Арат шөлүнден "Гастелло" аттыг национал паркка чедир байырлыг чыскаалга киришкеннер. Төрээн кожуунунуң адын алгап-мактап, ооң алдарлыг, хүндүлүг кижилерин таныштырарга, чүгле чаңгыс чер-чурттугларының эвес, аңаа турган көрүкчүлерниң безин хей-аъды ала чайгаар көдүрлүп, олар дээш чоргааралы оттуп, чыскаалдың киржикчилерин улуг өөрүшкү-биле уткуп турганнар.

Байырлыг чыскаалдың соонда, "Хүреш" аттыг стадионга бүгү чон чыглып келирге, Тываның Баштыңы Владислав Ховалыг, Тыванаын Дээди хуралынын даргазы Кан-оол Даваа, Тываның күчүтен мөгези Аяс Монгуш, "Тыва чоннуң чоргааралы" деп хүндүлүг аттың эдилекчизи, Тываның Улустуң хөөмейжизи Андрей Монгуш база Наадым байырлалдарының хөй санныг тиилекчи чылгычызы Байыр Доржу улуг саңны салганнар. Тываның Баштыңы Владислав Товарищтайович эге сөстү ап, Наадым байырлалы-биле изиг байырны чедирген.

Байырлалдың программазында янзы-бүрү танцы-сам, чүс игилчиниң көргүзүү, бичии мөгелерниң девии, тыва чараш кыстарның ак кадактарлыг танцы-самы байырлыг шинчини улам каастаан.

Наадым байырлалынга тураскааткан оюн-көргүзүгге Тываның салым-чаяанныг ыраажылары Ай-Кыс Кыргыс, Сайзана Сюрюн, Ишкин оглу, Айдаш Барынмаа, Кежик Дарый-оол, "Одучу" бөлүү дээш о.ө. артистер киржип, кайгамчыктыг өткүт, хоюг үннери-биле "Тыва мен" деп минниишкинни оттурганнар. Чыглып келген чон байырлыг кежээни магадап, изиг-изиг адыш часкаашкыннары-биле уткуп хүлээп турганнар.