Таңды кожууннуң драма театры-биле сөөлгү ийи чылда дыка чоок кады ажылдажылганы кылып чоргузуп чор мен....

Тыва Арат Республиканың 100 чылдаанынга тураскааткан мөөрейге сценарий бижип бээримге, ону режиссер Леонид Каң-оолдуң салганы-биле көргүзүү гран-при деп дээди шаңналга төлептиг болганнар.
Ооң соонда, база 100 чылга тураскааткан “Таңды Тывам чуртуңар бооп артар болзун” деп, ынчангы Суг-Бажынга Бүгү Тываның тургузукчу хуралы канчаар болганынга үндезилээн шиини бижип бээримге, ол шиини бүгү Тываның кожууннар төптеринге бараалгадып ойнап чорааннар. Шииниң тургускан режиссеру – Сайдаш Монгуш, чурук каасталгазын Начын Шалык чуруп кылган. Шииде ниитизи-биле 25 кижи киржип турар-даа болза, ынча хөй бот-тывынгыр артистерни чыып, эвилелдеп, эңмегелеп чоруп турары дээрге, бо улусчу театрның тура-соруктуун, боттарының ажыл-ижинге бердингенин, демниг болгаш чүткүлдүүн херечилеп турар. Ол дээрге дыка улуг чедиишкин деп үнелеп көөр-дүр мен. Бо чылдың ноябрь 18-те, Дүрген суурнуң Н.М. Усков аттыг культура одаанга “17-ги пациент” деп шиини аныяк режиссер Оттук Ооржак “Эмчилерге мөгейиг” деп аттыг тургускаш, чонга бараалгадып көргүскен. Чоокта чаа бо-ла театрның чагыы ёзугаар база бир чаа шиини бижип бердим. Ол шииниң ады – “Ожук” дээр. Ам ол чаа шиини тургузар ажылдар эгелеп турар. Ынчап кээрге, Таңды кожууннуң драма театры бодунуң адын төлептиг бадыткап, улуг шиилерни чалданыш чок ойнаптар кылдыр өзүлдени, дуржулганы, солун дилээшкиннерни чедип ап чоруурун бадыткап турар. Таңдының драма театрынга ам-даа чаа-чаа чогаадыкчы чедиишкиннерни, солун шиилерни, көрүкчүлери көргүзүглерин четтикпейн манап чорууру ынак театры болу бээрин алгап, йөрээп тур мен.
Орлан Дамба-Хуурак.