Агаар, хөрзүн, агым сугнуӊ

Агаар, хөрзүн, агым сугнуӊ
Ачы-күжүн сиирип каан дег,
Авыралдыг
Ак сүт ышкаш,
Ачылыг чем

Ады – тараа!
(Николай Ооржак)

Тараа байырлалы

Кожуун иштинге чарлаттынган «Кижизидилгениӊ болгаш өөредилгениӊ чылынга» база «Бүгү Россия чоннарынын культуразынын өнчүзүнүӊ чылынга» тураскааткан кожуун чергелиг «Тараа дою» деп байырлалды Балгазын ортумак школазы 2022 чылдын ноябрь 19-та «Чооду Начын» аттыг культура төвүнге демдеглеп эрттирген.
Ук байырлалга кожуун чагыргазынын даргазы Монгуш А.К., кожууннуӊ өөредилге килдизиниӊ даргазы Чамбал А.А, Тываныӊ национал школа хөгжүдер институдунун директору Куулар Е.М., ооӊ ажылдакчылары, көдээ ажыл-агый яамызынын төлээлери , кожууннун школа директорлары дээш оон-даа хөй аалчылар киришкеш, бедик үнелелди бергеннер.
Школанын директору Оюн Ч.В. келген аалчыларга четтиргенин илереткеш, суй-белектерни сунган. Клубтун даштынга бүрүнү-биле дериттинген каас-шиник өгнү тиккеш, тараага хамаарышкан аъш-чем мастер-класстарын көргүскен.
Байырлалдыӊ эгезинде келген аалчыларга болгаш киржикчилерге «Тараа – амыдыралдыӊ дөзү» деп делгелгени башкыларныӊ удуртулгазы-биле уруглар боттары таныштырганнар.
«Тараа байырлалынын» кол киржикчилери – кожууннун школаларындан чыынды бөлүк өөреникчилер. Клубтун өрээлдерин өртээлдер кылдыр дерээш, янзы-бүрү оюн-мөөрейлерни эрттиргени солун болгаш ажыктыг болган.
«Тараа – аас чогаалында»,
«Тараа- чечен чогаалда»,
« Чалбарыглар йөрээли»,
«Тарааныӊ эм шынарлары»,
«Тарааныӊ хевирлери, янзылары»,
«Тараадан кылган чемнер»
деп өртээлдерге уруглар билиин шенээннер.
Түӊнелинде Кызыл-Арыг ортумак школазынын өөреникчилери өртээлден өртээлче шииткекчилерниӊ, көрүкчүлерниӊ сонуургалын болгаш тиилелгени бүзүрелдии -биле чаалап алганнар. Ийиги черни Сосновка, үшкү черни – Бай-Хаак ортумак школалары алганнар.
Директорнуӊ кижизидилге талазы-биле оралакчызы Тюлюш А.Ч. өөреникчилерге болгаш удуртукчу башкыларынга четтиргенин илередип, өөрүп четтириишкин болгаш шынзылга бижиктерин хол белектери- биле кады сунган.
Байырлыг хемчег «Тыва Республиканын культуразынын алдарлыг ажылдакчызы», «Таӊды кожууннуӊ хүндүлүг чурттакчызы», дээди категорияныӊ ыры башкызы Дамчан Сергей Дондоковичиниӊ тургусканы «Тараам турда, тодуг-ла мен» деп концерти-биле доозулган. Аӊаа школаныӊ өөреникчилери болгаш башкылары киришкен.
Аалчылар болгаш киржикчилер сагыш - сеткили- биле мага хандыр дыштанып, өөрүшкүлүг чанганнар.

#Танды
#ТарааБайырлалы
#КижизидилгеБолгашОоредилгеЧылы