Төлептиг шаңнал – Россияның делегей чергелиг спорт мастери

Төлептиг шаңнал – Россияның делегей чергелиг спорт мастери
Кады хостуг хүрешке хүрежип чораан хүндүлүг эжим- Оюн Станислав Чертак-ооловичиге спортчу хүрешке Россияның делегей чергелиг спорт мастери атты алганы-биле изиг байырымны чедирип ор мен.
Станислав Чыртак-ооловичини эки таныыр база амга чедир эдержип чоруур болгаш, бо материалды бижип орарым ол
Оюн С.Ч биле чаңгыс килге Тыва АССР-ниң хостуг хүреш маргылдаазынга киржип, чаңгыс эвес бирги болгаш шаңалдыг черлерни ап чордувус. Оон аңгыда 1970 чылдарның төнчүзунде янзы-бүрү спортчу ниитилелдер: "Спартак", «Күш-ажыл курлавырлары», ажык маргылдаалар «Оюн Күрседи», «Обком ВЛКСМ» аттыг хостуг хүрешке маргылдаалар болуп турган. Бо маргылдааларга соңгаардан база мөгелер киржип турганнар. Маңаа база чедиишкинниг хүрежип база турган бис. Мен кил аайы-биле тыва хүрешке база хүрээжип турдум, ооң түңнелинде бир дискээмниң сиири үзүлген, кезиишкини кылган соонда соңгаар хоорайга самбо хүрежип турумда база катап кемдээшкини алдым. «Центр Азия» маргылдаазынга кемдээн будум-биле хүрешкеш таптыг хурешпээнимден чүгле дөртке четкеш, дыка-ла хомудаан мен. Ол хевээр хүрешти кагган. Станислав Чыртак-оолович улаштыр хүрежин кагбайн, улгады бергеш-даа Европа, Делегей маргылдааларынга хостуг хүрешке хоочуннар аразынга чаңгыс эвес шаңналдыг черлерни ээлээн. Ынчангаш ооң биографиязы хүреш хевизи-биле чарылбас харылзаалыг кижиге бо ат хөй чылдарның ажылының минниишкинниг үнелели, база бир бедик үстү, алдар-хүндү-биле тиилеп алган болур.
Станислав Чертак-оолович күш-ажылчы базымнарын Тыва Республиканың профессионал өөредилге эргелелинден «Күш-ажыл курлавырлары» спортчу ниитилелге спортчу хүрешке тренер-башкы болуп эгелээн. Ол чылдарда бо ниитилел бүгү Россияда ортумак профессионал өөредилге черлерин хайгаарап турган, аңаа ооң тренер салым-чаяаны тывылган.
1993 чылдан бо хүннерге чедир Кызыл хоорайда техникумнуң ханаларында ажылынга шынчы болуп артпышаан. Ниити ажыл стажы - 41 чыл - бүдүн үе, чүс-чүс оолдарга эрес-дидим чоруктуң школазынга бараан болган.
Станислав Чертак-оолович бодунуң ус-шевериниң чажыттары-биле ачы-буянныг үлежип, спортка ынакшылды болгаш кадык амыдыралды оттуруп турар. Ол ССРЭ-ниң спорт мастери деп атты эдилеп чоруур болгаш хоочун мастерлер аразынга хостуг хүрешке делегей чемпионадынга шаңналдыг черлерни ап, чаңгыс эвес удаа пьедесталга үнген.
Станислав Чыртак-оолович «Тыва Республиканың болгаш РФ-ның күш-культура болгаш спорттуң тергиини». Ооң күжүн көөрге, назы-хар дээрге чүгле паспортта сан-дыр деп бүзүреп болур. Ынчангаш күш- шыдалы ам-даа эки мага-боттуг, аныяктарга үлегерин көргүзүп турар.
Ооң амыдырал-чуртталгазының чажыттары бөдүүн: багай чаңчылдардан шуут ойталаары, идепкейлиг амыдырал, дагларга ынакшылын ол тура-сорук-биле тиилеп алыр. Оон ыңай башкының салым-чаяаны чүгле спорт-биле кызыгаарлаттынмас. Ооң аажы-чаңының база бир талазы – ырлаарынга кайгамчык талантызы, база ажыл-херекке бердингени - ооң шаңналдары ону тодаргай бадыткап турар.
Ол 2009 чылда мөөрейге тиилээш, эге профессионал өөредилгеге тергиин башкы ажылдакчызы деп Тыва Республиканың Чазааның даргазының шаңналын алган.
Аңаа 2022 чылда «Тыва Республиканың алдарлыг ажылдакчызы» хүндүлүг атты тывыскан.
2023 чылда «Күш-культура болгаш спорт талазы-биле тергиин дагдыныкчы» деп регион чергелиг маргылдаага тиилээн.
Ол дээрге ооң шаңналдарының чүгле эвээш кезии-дир – республиканың спорт болгаш өөредилге хөгжүлдезинге үнелеп четпес үлүг-хуузун кииргениниң бадыткалы.
Станислав Чыртак-оолович- үлегерлиг өг-бүлелиг кижи дээрзин немээр апаар. Ындыг улус ёзулуг үлегер-чижек болур.
Бо бедик атка төлептиг болганыңар-биле база катап сеткилиниң ханызындан байыр чедирип тур мен. Оюн уктуг мөгелерден Россияның делегей чергелиг спорт мастери атты бир дугаар чедип алган-дыр сен,эжим.
Ажыл-ижиңге ам-даа улуг чедиишкиннери кузедим!.
Сергей Оюн.