Байырлалга ужуражылга

Байырлалга ужуражылга
Куулар (Оюн) Галина Агбан-ооловнаның 70 харлаан байырлалынга чаңгысклассчы эштерим: Куулар (Монгуш) Мария, Чүльдүм (Оюн) Тамара Кечил-ооловна, Барнакова (Санчай) Надежда Чульдумовна, Мөндүмей Надежда Монгалбиевна, Сарыг-оол Маша Анчы-Суреновна суглар барып чордувус.
1971 чылда Кочетово 8 чыл школазын дооскан соонда.чаңгысклассчылар Бай-Хаак суурнуң ортумак школазынга өөренип кирип алган бис. 9 класска шупту 34 хире өөреникчилер: Арыг-Бажы, Балгазын, Сосновка, Межегей, Успенка, Победа суурлардан өөреникчилер Бай-Хаактың интернадынга чурттап,өөренип турдувус. Ол суурларга, тыва 9-10 класстар чок турган болгаш Бай-Хаак школазынга өөреникчилерни улаштыр өөренири-биле киирип каан турганы ол. Галина Агбан-ооловна класстың даргазы турган. Өөрениринге салымныг кижи, эки демдектерге өөренир. Интернадывыстың чанынга баскетбол, волейбол шөлдери турган, орайга чедир ойнаар турдувус, ынчангаш спортка чаңгысклассчылар шыырак турган, Уругларывыстың чамдыызы интернат уруглары биле республикага болган хол бөмбүүнге чемпионнап-даа турдулар.
9 класска өөренип тургаш чамдык эштеривистиң хөй кезии улаштыр өөренмейн, өскээр өөренип чорупканнар. Оолдардан Монгуш Сергей, Куңгаа Сергей хөөкүй, Шимит Коля сурлар артып каан бис. Школа доозулган, чамлык оолдар, уруглар чайгы дыштанылгазында чаңгылай бергеннер. Интернаттка оолдардан Шимит Коля, 8 класстан Шириижик Олег, оон артканын сагынмас-тыр мен, уруглардан Монгуш Мария,оон артканнарын база сагынмас-тыр мен. Артып калгаш, интернадывысты боттарывыс чугайлап дооскаш тарап чаңгыңгылай берген бис. Школадан документилеримни ап алгаш Кызылдың педучилищениң күш-культура салбырынче шылгалдаларны эки дужаагаш кирип алган мен. Коляны дыңнаарымга база өскээр өөренип чорупкан болду. Ынчангаш 1973 чылда Бай-Хаак школазын 15 хире, оларның аразында Монгуш Сергей биле Куңгаа Сергей доостулар. Кады өөренип турган өөрлерим школа дооскан соонда аңгы-аңгы ортумак, дээди эртем өөредилге черлеринче кирип алгаш дооскаш, Тывавыстың кожуунарынга ажылдап, өг-бүле тудуп, амыдырап чурттай бердилер. Ынча хөй кады өөренип чораан эштеримиң чамдыктары аныяанда-ла чок болганы дыка хомуданчыг. Амгы үеде 6 хире эштерим артып калгаш, Галина Агбаан-ооловнаның мугур харлаанынга чедип келдивис. Дыка-ла өөрүнчүг болду, үр үениң иштинде ужурашпаан бис. Галина Агбан-ооловнага бисти байырлалынче чалааны дээш четтиргенивисти илеретпес аргавыс чок, Чаңгысклассчылар хөглеп, ырлап, танцылап, мага хандыр хөөрежип алдывыс-даа
Байырлалга чедип келген чаңгысклассчы эштеримден: башкы, эмчи, культура ажылдакчызы, алдарлыг тудугжу, бухгалтер ИХЯ-ның хоочуну, күш-ажылдың хоочуннары, Тыва Републиканың алдарлыг ажылдакчылары болдулар.
Галина Агбаан-ооловна Бай-Хаак школазын 1973 чылда кончуг эки демдектерлиг дооскаш, дээди эртемин Красноярск хоорайның көдээ ажыл-агый институттуң зоотехниктиг факультетиниң зооинженер эртемин кызыл дипломнуг дщооскаш, күш-ажылчы базымнарын Каа-Хем кожууннуң «Улуг Октябрь» совхозка. мал ажыл-агый талазы-биле специалист-селекционер болуп эгелээн. Ол-ла хевээр Каа-Хем кожуунга өг-бүле тудуп ажылдап чурттай берген. Ажылдап тургаш, ол бодун, принциптиг бедик мергежилдиг кижи болгаш харыысалгалыг, ажылынга улуг арга-дуржулгалыг специалист деп бадыткаан түңнелинде, Каа-Хем кожууннуң чагыргазынга депшидип ажылдай берген.
Ол 2003 чылдан 2023 чылга чедир Каа-Хем кожууннуң чагыргазының муниципалдыг албан эргелекчизиниң албан-дужаалындан ээлээн. Бодунуң ажылынга кызымак, документация болгаш архивтиң теоретиктиг болгаш практиктиг үндезиннерин эки билир бедик мергежилдиг болгаш харыысалгалыг эргеплекчи болуп, «Практика» электроннуг документ башкарылга тургузуун (СЭД) бир дугаар ажыглакчызы болган. Ол дээрге админстрацияга документилерни иштики эргилдеге саазынга парлавайн, электроннуг хевирге тургузуп, бадылап, бүрүткедип, кадагалап, башкарып шыдаар программа (азы платформа)-дыр. Электроннуг документилерни башкарар системаның шупту нарыыдаашкыннарын билип алгаш, административтиг ажылдакчыларга болгаш организацияларның удуртукчуларынга өөредилге семинарларын эрттирген. Аныяк мергежилдиг кижилерни өөредип, ажыл хүннерин шын планнаарынга, ажылдаар аргаларны шилип алырынга дузалажып, частырыгларны шын көргүзүп, тыптып келген айтырыгларның шиитпирлерин сүмелеп турарган. Ооң улуг ажыл дуржулгазы, энерел сеткили, кижилерге кичээнгейлиг хамаарылгазы тус черниң чурттакчылары-биле эки харылзаа тударынга дузалаан. Ындыг ажылдакчы, дагдыныкчы кижи кожууннуң администрациязынга херек.болбайн канчаар. Ынчангаш ам-даа Каа-Хем кожууннуң администрациязында кол специалист болуп ажылдап чоруур.
Куулар Галина Агбан-ооловнаның хөй чылдар иштинде ак-сеткилдиг кызымак ажылын, ооң ачы-дузазын болгаш идепкейлиг хамааты туружун,Тыва Республиканың Чазаа демдеглээш:
-Күш –ажылдың хоочуну;
-Тыва Республиканың алдарлыг ажылдакчызы;
-«Эрес-дидим күш-ажыл дээш» медаль болгаш Хүндүлүг бижиктер-биле шаңнаан.
-РФ-ның тус чер бодунуң хүндүлүг ажылдакчызы;
-Россия Федерациязының Төп соңгулда комиссиязының Хүндүлүг бижии;
-Каа-Хем кожууннуң Хүндүлүг хамааттызы деп шаңналдарны тывыскан.
Школа дооскандан бээр чаңгысклассчылар 53 чыл бооп тур бис. Эштеримге ам-даа улуг назыны, аас-кежикти, кадыкшылды күзеп ор мен.
Материалдарны байырлал үезинде Галина Агбан-ооловнаның кады ажылдап чоруур эштериниң чугаазындан алган.
Чуруктарны Монгуш Мария чоргускан.
Тыва Республиканың алдарлыг ажылдакчызы, Таңды кожууннуң Улустуң депутады Сергей Оюн