Таңды, Улуг-Хем, Каа-Хем, Эрзин, Кызыл кожууннарындан база Кызыл хоорайдан тыва хөөмей-сыгыттың тергиин дээн...

күүседикчилери республика чергелиг "Таңды сынның эдискизи" деп мөөрейге киржири-биле, Таңды кожуунга чыглып келгеннер. Балгазынның Начын Чооду аттыг көдээ культура бажыңынга бичии болгаш элээди назылыг киржикчилерниң күүселдези-биле хөөмейниң янзы-бүрү хевирлери куттулуп хүнзээн. Показать ещё
Тыва Республиканың алдарлыг артизи, улустуң аас чогаалынга үндезилээн "Тыва" бөлүүнүң уран-чүүл удуртукчузу чораан Начын Александрович Чоодунуң чырык адынга тураскааткан "Таңды сынның эдискизи" мөөрей бедик деңнелге эрткен, ол ам чыл санында болур.
Мөөрей ийи аңгы хар-назынныг бөлүк болгаш чаңгыстың күүселдикчилериниң аразынга болуп эрткен.

Мергежилиң тергииннери, тыва хөөмей-сыгыт-каргырааны делегейде чаңгыландырып чоруур алдар-сураглыг артистер мөөрейни деткип, чонга аян тудуп бергени хемчегни улам-на каастаан.

Начын Александрович Чооду уран салым-чаяаны-биле бодунуң соонда балалбас исти артырып каан Таңдывыстың, Тывавыстың ховар оглу чораанын билир бис. Адазының соон салгап, ооң кылып чораан ажыл-херээн уламчылаар оолдары чонунга бараан болуп чорууру өөрүнчүг. Өөнүң ишти, Тыва Республиканың улустуң хөөмейжизи, Тыва Республиканың алдарлыг артизи, "Ада-иениң алдары" аттыг орденниң эдилекчизи Чооду-Ооржак Шончалай Оюн-ооловна чонунга өөрүп-четтиргенин илереткеш, тыва үндезин культура төвүнүң удуртукчузу Көшкендей Игорь Михайловичиниң өөрүп четтирииишкин бижиктерин мөөрейни белеткеп, чорудуп келген идепкейжи бөлүктүң кежигүннеринге сунган.
Шииткекчилер бөлүү база-ла бедик мергежилдиг культура ажылдакчылары, олар киржикчилерни шыны-биле шиидип, түңнелди үндүргенннер:

14-тен 17 харга чедир чаңгыстың күүседикчилериниң түңнелдери:

1-ги чер: Чульдум Ичин-Норбу Асович;
2-ги черде Дартык-оол Намзырай Алексеевич;
3-ку чер: Суван Амыр-Манаа Мергенович.

7 хардан 13 харга чедир:
1-ги чер: Чооду Окчаа Начын оглу;
2-ги черде Дажы Рустам Русланович;
3-кү чер: Донгак Доржу Буян-Бадыргыевич.

Бѳлүктер:
14 хардан 17 харга чедир:
1-ги черни Улуг-Хем кожууннуң «Дембилдей» бөлүү чаалап алган;
2-ги чер: «Дыңгылдай» (Эрзин кожуун);

7 хардан 13 харга чедир:
1-ги черни Межегейден «Эртине-Булаа» бөлүүнге тывыскан;
2-ги чер: «Дембилдей» (Улуг-Хем);
3-кү черни Каа-Хем кожууннуң Суг-Бажы суурдан «Арбай-Хоор» база Кызыл кожууннуң Кур-Черден «Чедер» бѳлүктери үлешкеннер.

Тускай шаңналдар (номинациялар): 14-17 хар:
Сыгыт күүселдезинге Куулар Айдыс Александрович, борбаң хевиринге Ооржак Тумен-Байыр, хѳѳмейге соруктуу дээш Белецкий Юрий Юлдашевич тѳлептиг болганнар.

7-13 харлыглар аразынга тускай шаңналдар::
Хѳѳмей хевиринге Шактар Айыжы Арсланович, сыгыт хевиринге Конгар-оол Сонам Чингисович, каргыраа хевиринге Монгуш Алдын-Херел Арамович, эзенги хевиринге Мундупай Норбу Сергеевич, сыгыт хевиринге Айыыр Улар Шораанович, каргыраа хевиринге Сартыыл Амыр-Санаа Ахметович тѳлептиг болганнар.