Межегей суурга ном байырлалы

Межегей суурга ном байырлалы
2026 чылдың март 19-та Таңды кожууннуң Межегей суурнуң Көдээ культура бажыңының чылыг залынга салым-чаяанныг чогаалчы, хүндүткелдиг башкы, шүлүктер, чечен- мерген барымдаалыг чугаалар бижикчизи, «Таңды-Уула» чечен чогаал каттыжыышкынының кежигүнү Ондар Зоя Үгүжековнаның «Сеткилимниң хөөннери» деп чаа номунуң чогаадыкчы кежээзи болгаш таныштырылгазы болуп эрткен. Шынап-ла, чылыг-чымчак сагыш-сеткилдиң, төрээн дылынга, төрел чонунга ынакшыл-биле долган кежээ болду.
Шагда-ла бажыңынга кыдыраажынга бижиттинген хөй санныг шүлүктерин, чечен болгаш барымдаалыг чугааларын ном кылдыр парлап үндурер дээн күзели бүткен. Ынчангаш бодунуң өөрүшкүзүн үлежип, чаңгыс чер чурттугларынга бодунуң номун таныштырып турары бо.
Бо байырлалга авторнуң өөрүшкүзүн хүндүлүг аалчылар үлежип чедип келгеннер:
- Мунзук О.Ч-Межегей суурнуң администрациязының даргазы;
-Монгуш А.Э-Межегей суурнуң Төлээлекчилер Хуралының даргазы.
-Монгуш Ч.Т-Таңды кожууннуң Төлээлекчилер Хуралының депутады;
-Нурзат У.М-Таңды кожууннуң баштыңы-Төлээлекчилер Хуралының даргазы;
-Оюн Ч.С, Оюн И.И-«Таңды-Уула» солунунуң редактору, корреспондентизи;
-Дембирел С.Ч. Таңды кожуунда "Ада-чурт камгалакчылары" фондузунуң социал координатору;
- Монгуш Т.К-«Таңды-Уула» чечен чогаал каттыжыышкының удуртукчузу;
Кызыл хоорайдан чалаттырган аалчылар:
-Комбу С.С- ТР-ның Чогаалчылар Эвилелилиң даргазы, дыл эртемнеринге кордакчызы;
-Чооду К-К.К- ТР-ның Улустуң чогаалчызы;
- Иргит М. К- Мөңгүн-Тайга кожуундан Тыва Республиканың чоргаалчызы;
-Чооду В.А-РТ- ТРның алдарлыг артизи;
-Данзын К.М- ТР-ның культуразының алдарлыг ажылдакчызы,Таңды кожууннуң культуразының алдарлыг ажылдакчызы;
-Мартый-оол В.В.- ТР-ның Улустуң артизи, ТР-ның культуразының алдарлыг ажылдакчызы, Таңды кожууннуң культуразының алдарлыг ажылдакчызы;
ол ышкаш хоорайдан болгаш кожуундан келген хүндүлүг аалчылар.
Байырлалдың башкарыкчызы: Чалбак Ч.К-Межегей суурнуң Көдээ культура бажыңының уран чүүл удуртукчузу, Таңды кожууннуң культуразының алдарлыг ажылдакчызы. Тускай прогаммалыг байырлыг кежээни уткалыг болгаш чогаадыкчы кылдыр организастаан-
номнуң арын бүрүзү сцена кырынга дириг апарган ышкаш болган.
Межегей суурнуң «М.М.Мунзук» аттыг уран чүүл школазының башкылары Зоя Үгүжековнаның сөзүнге композитор Ховалыг Г.Д-ниң аялгазынга бижээни «Чыраа-Бажы» деп ыры-биле байырлыг хемчег эгелээн.
Межегей сумузунуң администрациязының даргазы Мунзук О.Ч суурнуң хоочун башкызы Ондар З.У-га база номунуң байырлалынга чалаттырган аалчыларга, чонунга чыглып чедип келгенинге өөрүп четтириишкинин илередип, номнуң таныжылга байырлалын ажыткан. Улаштыр-ла суурнуң Төлээлекчилер Хуралының даргазы Монгуш А.Э база чылыг чымчак сөстери-биле Зоя Үгүжековнага база-ла чалаттырган аалчыларга өөрүп четтириишкинниң сөстерин чугаалаан. Суму даргазы Мунзук О.Ч, Хурал даргазы Монгуш А.Э олар «Өөрүп четтириишкин» бижиктерин Ондар З.У-га тывысканнар.
Башкарыкчы номунуң дугайында көрүкчүлерге таныштырып бээри-биле сөстү номнуң автору Зоя Үгүжековнага бээрге, дыка солун кылдыр чугаалады. Шүлүк бижиирин Чыраа-Бажы суурунга 6 класс тургаш-ла бижип эгелээш, назы-хары улгаткыже улаштыр бижип чоруурун база таныштырды. Ооң соонда Зоя Үгүжековна бодунуң чогааткан тыва, орус дыл кырында кезек шүлүктерин номчуп чугаалады, езулуг артист кижи ышкаш чараш кылдыр номчуурга, чон дыка сонуургап, адыш часкап турдулар.
Межегей суурнуң уругларның уран чүүл башкылары Зоя Үгүжековнаның Межегей суур дугайында бир шүлүүнге ырыны ол-ла школаның башкызы, композитор Солаңгы Кызыл-ооловнаның аялгазынга бижээн ырызын ырлап күүсеттилер.Композитор авашкылар Солаңгы Кызыл-ооловна, авазы Галина Давааевна Зоя Үгүжековнаның шүлүктеринге чаа ырыларны чогаадып бижээш, номунуң байырлалынга белек кылдыр күүсеткени дыка өөрүнчүг.
ТР-ның Чогаалчылар Эвилелиниң даргазы Комбу С.С, ооң кежигүннери сценага үнүп келгеш, Зоя Үгүжековнага чылыг-чымчак сөстери-биле номун парлап үндүргенинге байырын чедиргеш, номнарны белекке сөңнедилер. Межегей суурнуң ном саңының эргелекчизи Барашева М. Н-га база Сайлыкмаа Салчаковна номнарны белекке берди. Сайлыкмаа Салчаковна Тываның Чогаалчылар Эвилелиниң кежигүнүнге Зоя Үгүжековнаны хулээп алган. Ону манап турган хоочун башкывыстың өөрүвес аргазы чок болду.
Таңды кожууннуң баштыңы-Төлээлекчилер Хуралың даргазы Нурзат У.М номнуң автору Зоя Үгүжековнага база чылыг чымчак сөстерин чугаалап, «Хүндүлүг бижикти» база боодал чечектерни депутаттары- биле сунгаш, Таңды кожууннуң даргазы Коңгар А.Н-ниң үндүрген Доктаалы-биле «Офицерниң иези» база «ТАР-ның 100 чылы»деп медальдарны тывыскан.
Таңды кожууннуң администрациязының Зоя Үгүжековнага шак ындыг бедик шаңналдарны тывысканы башкыга өөрүнчүг болган, чүге дизе хоочун башкы 38 чыл ажыг башкылааш, кандыг-даа шаңнал албаан, безин чадаарда кожууннуң Хүндүлүг бижии безин чок турган. Хоочун башкының ажылын ынчаар бедии-биле үнелээнинге катчып, өөрүвес аргам чок болду. Эр хейлер!
«Таңды-Уула» чечен чогаал каттыжыышкынының удуртукчузу Монгуш Т. К
Зоя Үгүжековнага «Өөрүп четтириишкин бижиин» база суй-белекчигешти сунуп, чогаадыкчы ажылынга чедиишкиннерни күзээн.
Зоя Үгүжековнага ТР-ның Улустуң чогаалчызы Чооду К-К, «Таңды –Уула» солуннуң ажылдакчылары, Межегей суурнуң албан черлериниң удуртукчулары, ажылдакчылары, клазының өөреникчилери, ажы-төлдери, төрелдери болгаш суурнуң чурттакчылары белектерни, чечектерни, сунуп, чылыг сөстери-биле байыр чедирип турдулар. Оларның сеткилинден байыр чедирип, башкының чогаадыкчы ажылын бедик үнелээни ону улам чалгынналдырган.
Тыва Республиканың Улустуң артизи Виктор Мартый-оол, ТР-ның культуразының алдарлыг ажылдакчызы, композитор Кертик-оол Максимович база уран чүүл школазының башкылары көрүкчүлерге солун концертти бараалгатканнары өөрүнчүг. ТР-ның алдарлыг артизи Вероника Чооду тыва улустуң «Межегейим» деп ырызын көрүкчүлер-биле кады ырлааны база өөрүнчүг. Байырлалды көрүкчүлер шуптузу туруп келгеш, «Төрээн Тывам» деп ырызын ырлап, номнуң байырлалын дооскан.
Номнуң байырлалынга чедип келген аалчыларны Зоя Үгүжековнаның ажы-төлдери, төрелдери культура бажыңының өрээлинге изиг аъш-чеми, сүттүг шайы, суксуннары-биле хүндүледилер.
Угбазының номунуң байырлалын организастап эрттиреринге улуг үлүг-хүүзүн Оюн София Үгүжековна кииргенин мактавас аргам чок. Ол боду 40 ажыг чылдар иштинде почта эргелекчилеп ажылдааш, хүндүлүг дыштанылгаже үнгеш, амгы үеде «Өлчей» садыында хеп даарап ажылдап турар. София Үгүжековна - ТШО-га ачы-дузаны көргүзүп чоруур эки турачы.
Таныштырылга ному аалчыларның сагыш-сеткилинге чырык исти арттырып, бедик деңнелге эрткен. Межегейжилер, эр хейлер!
Бөдүүн башкының номунуң байырлалын суму, культура, школа, уран чүүл школазы демниг эрттиргенинге Зоя Үгүжүковнага улуг өөрүшкү, белек база бир уттундурбас төөгүлүг хүн болган.
Зоя Угужековнага моон-даа соңгаар чогаадыкчы ажылы- биле чонун өөртүп чоруурун, бийири ам-даа чидиг болурун күзеп каалыңар.

Таңды кожууннуң Улустуң депутады Серей Оюн