Питерде буянныг тыва эмчи уруувус

Питерде буянныг тыва эмчи уруувус
Шынап-ла 21-ги чүс чылдың эгезинден тыва оолдар, кыстарывыс Россияның, даштыкының девискээрлеринде өөренип, чурттап, ажылдап чоруурлары эвээш эвес, өөрүнчүг-дүр.
«Куш оглу каяа-даа ужар, кижи төлү каяа-даа чоруур» дээр болгай. Мерген угаанныг тыва чоннуң үлегер домаанда кончуг-ла шынын чугаалаан. Тываларның кайда өөренип, чурттап, ажылдап чоруурун оларның боттарынга-даа ужуражып, солун-сеткүүл, интернет-четкиден номчуп, көрүп чор мен. 60-70 чылдарның эгезинде Абакан хоорайны дыка ырак черде турар, аңаа чедери берге деп билип чораан бис. Ынчангаш ССРЭ үезинде тывалардан соңгаар өөренип чоруурлар ховар турган. Хөй машиналар, автобустар турбаан, самолеттар база ховар ужар, Саян ажар оруктар дыка берге турган, ол дугайында менден-даа улуг, үе-чергем-даа улустар дыка эки билир.
«Шаг шаа-биле турбас, чавылдак көгу-биле турбас». Ол база тыва улустуң база бир мерген угаанныг үлегер домаа болгай. Тыва чон феодалдыг чуртталганы эрткеш, капитализмни ажа халааш, коммунизмче (анаа мээң бодалым) углап бар чыткан бис.
Тыва черин, чонун алдаржыдып, өске черлерде демниг чурттап чоруурлары кайы хөй. Бир чижекти киирип көрейн.
2026 чылдың январь 23-те Санкт-Петербург хоорайның «Киров» аттыг медакадемияның госпиталында нейрохирургия салбырында Салчак Анчы Орланович деп 19 харлыг оол ТШО-дан балыглангаш келген, контрактны Иркутскиден чарган, документизинде Кызылдан оол-дур, чугааланмас.Эмнеп турар эмчизи Куулар В.К авазындан Тываже контактылар таварыштыр төрелдеринге, таныыр улустарынга дыңнадырын дилээн. Ол дыңнадыг дораан Тывага тарай берген. Бистиң чангыскурсчу эживис, Чөөн-Хемчик кожууннуң баштыңы Инна Б.М база бистерже маадыр оглувустуң дөргүл-төрелдерин тыпчып бээри-биле дыгнадыгны чоргускан. Маадыр оглувус Салчак А.О-ниң төрелдери тывылган хевирлиг.
Үстүнде чүүлдерге үндезилеп бижип турарым болза, тыва кижи каяа-даа чурттап, ажылдап чорааш, чуртунга, чонунга ынаан көргүзүп турар-дыр. Балыглаткан маадыр оглувусту буянныг тыва уруувус эмнеп турары чоргааранчыг, ооң ачызында оолдуң чоок кижилери тывылган. Буянныг эмчиниң авазы уруунуң дыңнадыын Тыва иштинге контактыга чарлап, чугааланмас столдат оолдуң ада-иезин, төргүл-төрелдерин тыварынга улуг дузазын көргүзүп, буянын чедирген.
«Куш оглу каяа-даа ужар, кижи төлү каяа-даа чоруур» дээни ышкаш, Тыва чуртувустуң база бир буянныг мергежилдиг уруу өске черде чурттап, ажылдап чорууру чоргааранчыг-дыр. Улуг- улуг чедиишкиннерни буянныг эмчи уруувуска тыва чонумнуң мурнундан күзеп каайн.
Таңды кожууннуң Улустуң депутады Сергей Оюн.