Таңды кожууннуң шылгараңгай башкызы

Таңды кожууннуң шылгараңгай башкызы
2025 чылдың ноябрь 14-те Таңды кожууннуң Межегей суурнуң ортумак школазының технология (күш-ажыл) башкызы Бакай Валерий Доңгаковичиниң ажылдап орар кабинединге сонуургап чеде бердим. Межегей школазының өөреникчилериниң ажыглалында бүдүн мастерская бар. Ындыг онза өөреникчилерге тааржыр мастерскаяны көрбээн мен. Мастерскаязын чараштыр кылып делгеп алган. Өөреникчилериниң ыяштан болгаш өске-даа материалдардан кылган ажылдарын делгеп салган. Оолдар биле уругларга кичээлдээринге ийи аңгы кабинеттерни таарыштыр кылган. Мастерскаязының кирер эжиин чараштыр каастап кылып алганындан башкының чазаныр шынары оон көстүп турар.
Валерий Доңгакович Бакай- Межегей ортумак өөредилге школазыың дээди чаданың күш-ажыл (технология) башкызы, төрээн чери дээш туруштуг, соруктуг база дагдыныкчы, салым-чаяанныг башкы. Ниити ажыл стажы 40 чыл, ооң иштинде 22 чыл иштинде башкылап чоруур. Ол чүгле башкы эвес, бүгү-ле сеткили-биле ажылынга бердинген кижи.
Ооң ажылгыр-кежээ, биче сеткилдиг, буянныг аажы-чаңы чүгле өөреникчилерин эвес, а ону таныыр кижи бүрүзүн сорук киирип чоруур. Межегей ортумак школазының доозукчузу, бүгү назынын төрээн школазынга бараалгадып, хөй салгалдарның өөреникчилеринге ёзулуг үлегер-чижээн көргүзүп турар. Валерий Донгакович өөреникчилеринге чүгле эртем-билигни дамчыдар эвес, а салым-чаяанын ажыдарынга база дузалаар.
«Эге школа назылыг уруглар-биле кижизидилге ажылының бир хевири кылдыр «Сделай сам» эртирип туар кружогунга езулуг салым-чаяанныг аныяк мастерлерниң чазаныр чери апаргаш, улуг чедиишкиннерни чедип ап турарлар. Ооң удуртулгазы-биле бөлүктүң өөреникчилери республика чергелиг даштан, ыяштан кылган дүрзүлер чонган делгелгелерниң болгаш мөөрейлерниң тиилекчилери болуп турары дээрге, башкының кызымак ажылын бо шаңналдар бадыткап турар.
Сенатор Дина Оюннуң шаңналдары дээш «Чонар-Даш-2023».
2023 чылдың ноябрь 1-де уругларның чогаадыкчы мөөрейиниң Гранд-призинге;
- "Даштан оюп кылырынга" «Сувенир» номинацияга 11 класстың өөреникчизи Монгуш Дарый Сайдашовна шаңналдыг черни алган.
-2 дугаар черни «Образ скакуна» номинацияга 8 класстың өөреникчизи Очур Угулза Аракчаевна алган.
17 чыл дургузунда, 2001 чылдан эгелеп, часкы дыштанылга үезинде “Город мастеров” деп республика чергелиг мөөрейни школачыларның аразынга эртирип эгелээн турган.
Тыва Республиканың өөредилге болгаш эртем яамызы «Мастерлер хоорайы» деп республика чергелиг мөөрейни 2023 чылдың март 27-де эртирген. Республиканың 16 кожууннарындан, Кызыл, Ак-Довурак хоорайлардан 256 салым-чаяанныг уруглар мөөрейге келгеннер.
Конкурстуң түңнелинде.
Оюп кылыры (ыяш болгаш өске-даа материалдардан) 5-8 класстарга чедир:
- 1-ги черни Куулар Ирбиш алган.
Республика чергелиг бот өөредилге -биле чуруур «Крымская весна глазами детей» мөөрейниң түңнелдерин 2021 чылдың март 22-де үндүрген.
11 -14 харлыг уруглар аразынга.
3-кү черни Монгуш Дарый алган.
Бакай В.Д-ниң күжениишкиннериниң болгаш өөреникчилериниң ажыл-чорудулгазының ачызында Межегей школазын өскертип каан: стенд болгаш фасад чаарттынган, беседка- биле доозукчулар аллеязы туттунган.
Чедиишкиннери дээш Валерий Донгакович Бакай хөй санныг шаңналдар-биле, ооң иштинде Тыва Республиканың Өөредилге болгаш эртем яамызының хүндүлүг бижиктери, РФ-тиң Өөредилге яамызының өөрүп четтириишкин бижии-биле боолгаш хөй санныг албан черлериниң хүндүлүг бижиктери-биле шаңнаткан.
Ооң аныяк салгалды кижизидеринге, белеткээринге киирген үлүг-хуузун үнелээри берге. Валерий Донгакович «Чүрээмни уругларга берип тур мен» деп Таңды-2025 деп профессионал мөөрейниң муниципалдыг чадазынга тиилээш, бодунуң бедик деңнелдиг мергежилин болгаш ажылынга бердингенин база катап бадыткап турар.
Бакай В.Д кады ажылдап турар башкыларының, өөреникчилериниң, ада-иелериниң база доозукчуларның хүндүткелин чаалап алган. Ооң биче сеткилдиг болгаш буянныг чоруу ону чүгле кайгамчык башкы эвес, ынчалза-даа арга-сүме азы деткимче дилеп болур кижи.
Үстүнде өөреникчилерниң ажылдары бүгү республикада эң бедик демдектерни ап турары дээрге, башкызының өөреникчилери дээш кызымак ажылы, ынакшылын бердингенин көргүзүп турар-дыр.Чугле ындыг башкыларга чоргаарланып болур бис!!!
Ынчалза-даа дыка хөй чылдар иштинде ажылдап каан башкыга Чазактың, Улуг Хуралдың шаңналдары чогун кайгадым. Бо дээргеп бөдүүн башкы-дыр, ажылын көөрге эки түңнелдер бар.
Сергей Оюн