Кандыг-даа ажыл кижини каастаар

Кандыг-даа ажыл кижини каастаар

Техниктиг ажылчын- аңгы-аңгы албан черлериниң арыг-силиин тудуп, хүлээлгелерин кызымак, ак сеткилдии-биле күүседип чоруур ажылчын. Аяк-сава чуп, шала чуп- албан черлериниң арыг-силиин тудуп чорууру дээрге-ле эң-не үнелиг ажыл-дыр.Чамдык техниктиг ажылчыннар чаңгыс-ла албан черлеринге 20-40 чылдар иштинде ажылдап чоруурлар. Ажылдап турган албан черлеринден шаңнал-мактал турбайн канчаар, ынчалза-даа ТР-ның, РФ-ның алдарлыг ажылдакчылары деп аттыг ажылчыннарны бо назынымда көрбедим, дыңнавадым-даа. Соңгаардан келген артист Тывага чангыс катап ырлап каарга, ТР-ның алдарлыг аттарын тыпсып каар. Бөдүүн ажылдакчы ол хире чылдар иштинде ажылдап каарга, алдарлыг аттарны тывыспайн турарары бар болгай. Кожууннарда та кандыг, бар-даа чадавас. Олар амыдырал- чуртталгазы дээш сөөлгү чылдарынга чедир хүндүлүг дыштанылгаже үнгүже чедир ажылдап чорааннар, а чамдыктары пенсияже үнзе-даа, улаштыр ажылдап чоруурлар. Ажы-төлдерин өглеп- баштаар, уйнуктарын азыражырынга дузалажыр дээш олар черле тура дүшпес, хүлээлген ажылынга бердинген ажылдакчыларны бо-ла көөр мен. Шак ындыг ажылдакчылар өске кожууннарда ышкаш, Таңды кожуунда база хөй. Ынчангаш чамдык билирим ажылдакчыларны биживес аргам чок:
Ындыгларга Бай-Хаак суурда чурттап чоруур Ульяна Хүлер-ооловна Оюн хамааржыр. Ол кижиниң допчу намдарын биживейн, чүгле чаңгыс албан черинге техниктиг ажылчын бооп хөй чылдарда ажылдап чораанын таныштырайн.
1994 чылдан эгелеп «Коммунизмниң херели» аттыг совхозтуң «Оңгар-Хову» бригадазының столоваязынга аяк-сава чууп ажылдап эгелээн. Ол бригадка ажылчыннар дыка көвей турган, олар тараа тарыыр, ооң соонда күзүн дыка улуг шөлде тараа ажаар турганнар. Ынча хөй ажылчыннарның чемненген соонда аяк-савазын, столоваязының иштин чууру амыр эвес, аныяк кижиге берге-даа болза, ажылынынга бердинген болгаш, ак-сеткилдиг ажылдап чораан.
1997 чылда Бай-Хаак суурга көжүп чедип келгеш, сентябрь айдан эгелеп школага техниктиг ажылчын кылдыр ажылдай берген. Чаңгыс албан черинде 18 чыл иштинде хүлээлген ажылын ак сеткилдиг күүседип, амга чедир ажылдап чоруур. Техниктиг ажылчын кылдыр албан черлеринге амга чедир ниитизи-биле 21 чыл ажыг ажылдап чорууру ол бооп турар. Хүндүлүг дыштанылгаже шагда-ла үнген-даа болза, хөй ажы-төлүн азырап, эртем-билиге чедирери-биле ол-ла школаның арыг-силиин тудуп, кызымак ажылдап чоруур.
Ажы-төлдери:
-Улуг оглу Мерген Москва хоорайда дээди эртемниг юрист, бир албан черинде ажылдап чоруур. Билиин бедидип, аспирантурада улаштыр өөренип турар;
-Уруу Красноярск хоорайда дээди өөредилге черинде эмчи черининиң сургуулу;
-База бир оглу- ТШО-ның Маадыры,чурттун камгалап тургаш, чок болган;
-Оглу Буян Кызыл хоорайның автодорожный техникумунда «Механик» мергежилинде өөренип турар.
-Бичии оглу Айдың Новосибирск облазының күрүнениң бюджеттиг профессионал өөредилге албан чериниң хем колледжизиниң сургуулу.
Бо –дур, бөдүүн техниктиг ажылчынның кызымак ажылы моон көстүп турар-дыр.
Ульяна Хүлер-ооловна ада-иезин дуңмалары-биле кады бичии тургаш чидирген-даа болза, бергелерни эрткеш, кызымак ажыл-биле ажы-төледирин база дуңмаларын бут кырынга тургузуп өстүрген буянныг ава болгаш дуңмаларының хүндүткелдиг, үлегерлиг угбазы.

База бир ындыг ажылдакчы херээжен кижини хүннүң-не даң бажында далажып ажылче бар чыдарын база бо- ла көөр мен. Ол болза Бай-Хаак суурда хөгжүм школазының 20 ажыг чыл ажылдап чоруур техниктиг ажылчыны. Ооң дугайында бижиир дээримге, чөпшээрешпес боорга, биживедим. Шак мындыг бөдүүн ажылчыннарны көргеш, улуг дарга-бошка болзумза, бедик аттан тыпсып, шаңнап-мактазымза-даа деп бодай бээр мен. Ажылы ындыг амыр белен эвес-даа болза, кызымак ак сеткили-биле ажы-төлун азырап, эртем-билигге чедирип, өглеп-баштап каар дээш кызып чоруур ажылчыннарны биживес аргам чок. Эр хейлер!